حقوقنا ومش راجعيين من غيرها
25 يناير عيد الشعب
-----------------------
م الأخر وبدون لا لف ولا دوران ولا تسويف ولا تأجيل ولا تثبيت ولا وعود لأننا شبعنا 30 سنه وعود بدون تنفيذ، عايزين حقوقنا فورا ومش طلبات لكن حقوق،وعاوزين فلوسنا ترجع ،وعاوزين كرامتنا ومش رجعين من غيرها عشان ياسارق قوتي يا ناوي علي موتي واحنا خلاص كسرنا الخوف .
البلد بلدنا والفلوس فلوسنا وأحنا الشعب أصحاب البلد ولازم نعيش مستوريين ، يعني الكل يبات متعشي ،ومصر مش فقيره لكن خيرها منهوب من شوية حرمية لكن لو فيه عدل كل الناس حتعيش في أمان، ومش حيبات فيها جعان.وناس عايشين في قصور وناس تانيه نايمين في الشارع وده مش حقد لكن العدل ،
التظاهر حق قانوني مادام بشكل سلمي وبدون عنف ولا تخريب والناس فاقت وعارفه حقوقها ،وطلبتنا بسيطه وحتتنفذ وده حق الله والحق ميزعلش .
الحقوق
- الأسعار تنزل للنص والمرتبات والمعاشات تضاعف فورا والشباب يا أما شغل يأما 500 جنيه بطاله لحد متلقولنا وظيفه مناسبه، أمال كنا بنتعلم ليه ،وناكل م اللي بياكل منه علاء وجمال وأحمد عز وتوفير كل السلع في الأسواق وعمر مايكون ع العيش طوابير ولازم ناكل زيكو لحمه اللي الناس نسيت شكلها مش ناس تاكل وناس تتحصر.
- لما نتحكم 30 سنه بقانون الطوارئ يبقي فين الأستقرار، من اليوم مفيش طوارئ ولازم يخرج م السجن المعتقلين وكل المظاليم ومفيش حاجه أسمها أعتقالات ولا مراقبات ولازم تتنفذ القوانين ويخرج فورا أمن الجامعة من كل الجامعات .
- حبيب العادلي قتل في ولدنا وداس بالجزمة علي كرامتنا ،وعلي حياتنا مش أمنين ،وكان فين أمن الدوله لما اتقتلوا المسيحين لازم العادلي يمشي اليوم وتتلغي فورا أمن الدولة ويتحاكم كل اللي قتلوا وعذبوا في ولادنا وممنوع أهانة أي مواطن لأن الأقسام دي بفلوسنا والشرطة ترجع زي زمان في خدمة الشعب مش لتعذيبه .
- مصر بلدنا جمهورية مش مملكه ولا تكيه ومفيش حاجه أسمها توريث، و30 سنه كفايه عليك تعلن فورا أنك مش حترشح نفسك تاني ولا حد من عيلتك لأننا مش كنبه حتتورث لجمال .ولازم يحكمنا اللي حنختاره وتتلغي مادة 76.
- ثروة مصر دا حق ولادنا وحديد مصر لازم يرجع وكل مصانعنا اللي أتباعت برخس التراب ولازم اللي سرقونا يرجعولنا فلوسنا عشان نعرف نعيش مستورين واليوم يتحولوا للمحاكمات وتسترد ألأموال ،لأن أمن الدولة أن الكل يبات شبعان وأحس في بلدي بأمان.
- مفيش غااز لأسرائيل يتباع بنص السعر والناس مش لاقيه الأنبوبه ومية النيل دي حياه أو موت ولازم تأمين مستقبلنا وده هوه امن الدولة.
- مجلس شعب ومجلس شوري دا ميلزمناش ولازم يتحلوا فورا هوه والوزارة الفاشلة وتيجي ناس مخترينها حقيقي مش بالتزوير والتسويد وكلهم منعرفهمش ولا حد فينا أختارهم .
الشرطه أهلنا وأخوانا وأحنا خارجين عشان تتحسن أوضاع الكل لينا وليهم ،والتخريب أحنا منعرفهوش وبنقول أحنا طيبين لكن عند حقوقنا وحوش، وأديكو شفتوا شعب تونس كان مقهور أول ما أتكلم وأتحرك شاف النور ومصر اللي عليها الدور.
متلمش غير نفسك الفرصه مبتتكررش وأوعي تشتكي تاني وتقول أنا مظلوم أو لو عاوز تاخد حقك تنزل يوم 25
قوم يامصري مصر بلدك بتناديك
التوقيع : شعب مصر
ليست هناك تعليقات:
إرسال تعليق